Çmimet e biletave të avionëve, në verën e këtij viti kapën majat.

Të fluturoje nga Europa drejt Rinasit në fillim të gushtit, bileta në një drejtim arrinte deri në 300 euro. E njëjta gjë ndodhi dhe në fund të gushtit dhe fillim të shtatorit, ku ikja nga Shqipëria ishte tepër e shtrenjtë, rreth 250-300 euro drejt qyteteve të Italisë dhe 500 euro drejt Gjermanisë.

Dr. Rolf Castro-Vasquez, drejtor ekzekutiv (CEO) i Tirana International Airport, që menaxhon me koncesion aeroportin e vetëm në vend, e pranon që çmimet e biletave në Shqipëri në verë janë një çmenduri. Por, në një intervistë të posaçme për “Monitor”, ai thotë se kjo nuk ka të bëjë me tarifat e aeroportit, që janë gjithë vitin njësoj, por me trafikun e rritur në dy-tre muajt e verës.

“Ne nuk jemi të lirë, por nga ana tjetër, kjo nuk është e lidhur me çmimet e biletave. Çmimet e biletave, veçanërisht në kohën e verës, janë të shtrenjta, sepse ka shumë njerëz që duan të fluturojnë, jo sepse ne kemi tarifa të larta”.

Tirana International Airport është gjendur së fundmi nën presionin e institucioneve të ndryshme për uljen e tarifave, që konsiderohen si një nga arsyet e biletave të shtrenjta. Autoriteti i Aviacionit Civil pohon se tarifat e larta që aplikon koncesionari pengojnë shtimin e linjave dhe hyrjen e operatorëve low cost. Qeveria, nga ana e saj, ka hapur së fundmi një tender për të audituar ecurinë e koncesionit për më shumë se një dekadë, saktësisht nga 2004 deri në vitin 2017.

Auditimi synon të skanojë ecurinë e zbatimit të kontratës së nënshkruar mes shtetit shqiptar dhe koncesionarit, duke pasur parasysh treguesit kyçë, si investimet, detyrimet, normën e fitimit dhe rikthimit të kapitalit, si dhe sa është respektuar përqindja e rënë dakord në planin fillestar të biznesit.

Nga ana e tij, Autoriteti i Konkurrencës i ka rekomanduar qeverisë që të rishikojë pagesat e shërbimeve të Aeroportit të Rinasit çdo tre vjet si një pikë që e sanksionon kontrata e lidhur mes shtetit shqiptar dhe koncesionarit.
Por, CEO i koncesionarit të Rinasit, ngul këmbë që nuk janë tarifat e aeroportit arsyeja e biletave të larta. Edhe nëse ulen tarifat, “çmimet e biletave nuk do të ndryshojnë. Nuk do ta kuptoni asnjëherë, por ato nuk kanë për të ndryshuar”, pohon ai.
Një zhvillim pozitiv është thyerja e monopolit të furnizimit me karburant, teksa një operator i dytë do të fillojë të funksionojë këtë javë.